اكتفاء "البلوبيري".. إنجاز زراعي عابر لوجع الجيب؟
جهينة نيوز -بقلم: نضال أنور المجالي
بينما الناس قالبة حواجبها من طحن الأسعار وتكاليف المعيشة اللي بتكسر الظهر، فاجأتنا وزارة الزراعة ببيان "رايق” على لسان معالي الوزير الدكتور صائب الخريسات، يبشّرنا فيه إن الأردن وصل الحمد لله لمرحلة "الاكتفاء الذاتي” من البلوبيري (التوت الأزرق)!
طبعاً، إحنا أول الناس اللي بنفرح لأي نجاح زراعي، والمزارع الأردني أثبت دايماً إنه شهم وبعرف يطوع الصخر. بس الواحد غصب عنه بصير يسأل: من كل قضايا الأمن الغذائي والهموم اللي على قلوبنا، صفينا بنحتفل بالاكتفاء الذاتي من التوت الأزرق؟! يعني فجأة صار همنا الاستراتيجي هل "التوت” متوفر في السوبرماركت ولا ناقص؟
المواطن البسيط متعود إن "الاكتفاء الذاتي" يكون في الشغلات اللي بتهم جيبه وفطوره اليومي؛ زي الطحين، الشعير، البندورة، الخيار، أو حتى البطاطا والزيت. أما يطلعلك وزير يقلّك أمورنا تمام مع البلوبيري، فهون بصير الواحد مش عارف يضحك ولا يبكي! وكأن لسان حال الحكومة بقول للناس: "لا تشيلوا هم الفطور، أهم اشي التشيز كيك والسموذي طالعين للعلالي!".
هسا كتحليل فني واقتصادي، بنعرف منيح إن الوزارات بتقصد بموضوع الاكتفاء إنه الإنتاج المحلي غطى السوق وصار في فائض للتصدير، وأن الزراعات هاي بتجيب عملة صعبة. بس بالواقع، الفجوة أطول من ناطحات السحاب بين لغة الأرقام الرسمية، وبين ميزانية البيت اللي كل يوم بتنكمش أكثر من اليوم اللي قبله.
بالختام، بنقول لمزارعينا يعطيكم العافية على كل جهد، بس يا ريت نسمع عن قريب خبر "الاكتفاء الذاتي" من السلع اللي بتنحط على سفرة الفقير قبل الغني، مش من فواكه النخبة اللي ما بنشوفها إلا بالصور على التلفونات!











